من ناهد العبدالله
فلافل +حمص بطحينة +متبل بادنجان +مامونية +فول +محمرة بالجوز ..الفلافل :انا بساوي كمية كبيرة وبقسمها بكياس وفرزها ..ننقع كيلو حمص قبل بيوم بمي ونفرمو ثاني يوم بالفرامة دور والدور الثاني نحط ملعقة ونص ملح وملعقة وسط بكربونات الصوديوم ونص ملعقة نعناع يابس وملعقة كبيرة كزبرة ناشفة وراس ثوم ونص كاسة مي وفي منون بيضيفو بقدونس على حسب كل واحد كيف بيحب يضيفلها ..حمص بالطحينة بجيبو معلب بس بحطو بالصحن ..متبل بادنجان :بادنجان مشوي ومهروس وسن ثوم وعلبة زبادي وملعقتين طحينة وعصير ليمونة وملح وشوي زيت زيتون نخلطهم مع بعض ...مامونية :فنجان قهوة سميد +فنجانين سكر + 3كاسات مي .بنحمص السميد بملعقة سمنة ليتشقر ونسوي بهالوقت على جنب المي والسكر ليغلي وبضيفو عالسميد وبعلي الغاز ليغلي غلوتين ونهدي النار ونغطي كمان شي غلوتين ثلاثة ونطفي ونحط ملعقة سمنة ممكن بلدي ونغطي ونخليها شي ربع ساعة هيي لحالها بتشرب ميتها .ووقت التزيين بنزينها بقشطة وقرفة ...فول :بنحط الفول المعلب عالنار وبضيفلو مي وبخلي ليستوي وبطفي عليه وبساوي عجنب سن ثوم مهروس وملح وعصير ليمونة وملعقة طحينة وشوية كمون وانا بضيف ملعقة زبادي وبنخلطهم مع بعض وبنحط الفول مع ميته عليهم وبنحركهم وبنحط عالوجه للزينة بندورة بقدونس وزيت زيتون ..المحمرة بجوز :بقلي بصلة صغيرة مفرومة ناعم بملعقتين زيت زيتون وعالنار لتذبل وبحط فوقها بندورة مقشرة ومفرومة ناعم وبقلب شوي وبضيف المحمرة عليهم وبحركهم عالنار شي خمس دقايق وبطفي النار وبضيف رشة ملح وحبة البركة وسمسم وبحركهم وبحطها بصحن التقديم وبزينها بزيت الزيتون والجوز ..
