من الشيف موني
وطريقته سهلة
اول حاجة مكونات الجاتوه الهرمى:
ربع كيلو دقيق سبونش فانيليا
ربع كيلو دقيق سبونش كاكاو
(وطبعا دقيق الاسبونش الجاهز مضاف ليه البيكنج بودر والمحسن والسكر احنا بنضيف فقط البيض والماء ومفيهوش مواد دهنية لأنه اسفنجى)
6 بيضات كبار
نصف كوب ماء
فانيليا
مكونات الحشو:
كوب ونصف كريم شانتى خام
2 الا ربع كوب ماء مثلج
3 ملعقة كبيرة حليب بودرة
2 ملعقة كبيرة كاكاو خام
5 ملعقة كبيرة سكر بودرة
(ةممكن بدل الحليب البودرة والماء مثلج حليب طبيعى)
وللتزيين:
جوز هند اصفر او حسب رغبتكم
الطريقة:
فى اناء هنحط سبونش الكاكاو و3 بيضات وفانيليا وربع كوب ماء وهنخفقهم بمضرب البيض لمدة 3 دقايق متواصلة لغاية مايغلظ الخليط ويبقى كريمى ونحط الخليط فى صينية مربعة على ورق خبز وندخله فرن حرارته هادية وطبعا كل فرن بيختلف عن التانى
وهنعمل كيك الفانيليا
فى اناء هنحط سبونش الفانيليا مع 3 بيضات وفانيليا وربع كوب ماء ونخفقهم بمضرب البيض لمدة 3 دقايق متواصل ونخفقهم بمضرب البيض لمدة 3 دقايق متواصل وندخلها فرن حرارته هادية لغاية ماتستوى
وبكده هيبقى عندنا ديسكين فانيليا وكاكاو وسمكهم مش هيبقى عالى لأن الصينية كبيرة ولأننا لسه هنعمل طبقات فوق بعض هنقلبهم على ورق خبز وندخلهم التلاجة لمدة يوم كامل وتانى يوم نطلعهم عشان نحضر الجاتوه واول حاجة هنعملها الكريم شانتى
هنحط كل مكونات الكريم شانتى مع بعض فى اناء ونضربهم بمضرب البيض لغاية مانوصل للقوام المطلوب وبكده يبقى الكريم شانتى جاهز عندنا ونحضر ادوات الفرد والتقطيع ونحط الكيكتين على بعض الفانيليا والكاكاو ونساوى اطرافهم بالسكينة المشرشرة ونقسمهم بالنص بالظبط هيبقى عندنا 4 ديسكات 2 فانيليا و2 كاكاو وهنحشى الكيك بالكريم شانتى وبكده هيبقى عندنا 4 طبقات بنى ابيض بنى ابيض وبينهم كريم شانتى ودايما واحنا بنشتغل هنساوى الاطراف بالسكينة المشرشرة وبدل مانقسم القطعة اللى عندنا مرة واحدة ويبقى صعب علينا فى الشغل هنقسمه ل 3 قطع متساويين وكل قطعة من دى هناخدها نقسمها بالجنب او بزاوية بالظبط ويستحسن نحط الكيك فى التلاجة بعد مانحشيه بالكريم شانتى عشان واحنا بنقسمه يبقى متماسك هتتقسم لقطعتين نحشيهم بالكريم شانتى وهيدينا شكل الهرم المبدئى هنغلف الجاتوه من برة بالكريم شانتى ونحط عليه جوز الهند ونقطعه قطع متساوية ومننساش ان لسه عندنا قطعتين هنعمل معاهم نفس الخطوات اللى فاتت وهيدينا شكل الجاتوه الهرمى الجميل
نفس المكونات والطريقة اللى استخدمناها فى الجاتوه الهرمى بالنسبة للكيكات والكريم شانتى هى اللى هنستخدمها فى جاتوه الشطرنج اللى هيختلف بس طريقة التقطيع
بعد مانحط ال4 شرايح فوق بعض ونحشيهم بالكريم شانتى ونقطعهم ل3 تانيين هنقطع بالطول ل3 قطع مثلا وهنحط القطع فوق بعض عكس بعض يعنى الشريحة البنى يبقى فوقها ابيض والابيض فوقها بنى عشان تدينى شكل الشطرنج وكل طبقة قبل مانحطها هنحط طبقة كريم شانتى هنغلفها بالكريم شانتى ونحط عليها جوز الهند ونقطعه
طبعا انا مش عارفة اشرح التفاصيل بالكتابة لأن صور الخطوات هى اللى بتوضح كلامى اكتر
وده الشكل النهائى للجاتوه الهرمى والشطرنج
